Maqedoni, shuhet Arbën Xhaferri 

Ai prej ditësh ishte ne gjendje te rende kome për shkak të një hemoragjie cerebrale. Xhaferri mbylli sytë në orën 16.00 të pasdites së sotme. 
Lajmi u konfirmua nga Spitali Klinik i Shkupit. Xhaferri vuante nga sëmundja e Parkinsonit, që ishte shkak për largimin e tij nga politika aktive, ndërsa kohëve të fundit ai merrej më shumë me shkrime editoriale. 

Arbën Xhaferri ishte deputet aktual i PDSH-së dhe kryetar nderi i kësaj partie. Ai për 12 vite me radhë drejtoi PDSH-në deri në vitin 2007, kur në krye të partisë erdhi zëvendësi i tij, Menduh Thaçi. 

AK: Humbëm një rilindas të madh

Nga Tirana lidhur me lajmin e hidhur ka reaguar Aleanca Kuqezi, e cila i ka shprehur ngushëllimet më të thella familjarëve të Xhaferrit. 

Në telegramin e saj, AK shprehet se shqiptarët humbën të vetme “mendje të kthjellët” që synonte bashkimin e trojeve të tyre. 

“Sot u nda nga jeta dhe nga ne rilindasi i madh. Arbën Xhaferri ishte mendja më e kthjellët e trojeve shqiptare. Lamtumirë Arbën Xhaferri, amaneti i bashkimit të shqiptarëve”, thuhet në telegramin e Aleancës. 

Rama: Humbje e madhe për botën shqiptare

Kryetari i Partisë Socialiste të Shqipërisë, Edi Rama ka shprehur hidhërimin e tij lidhur me vdekjen e Xhaferrit, përmes një mesazhi të publikuar në rrjetin social Twitter. 

Rama është shprehur se, Arbën Xhaferri ishte nje shqiptar jotipik, që tha të vërteta të mëdha e hapi rrugë të pashkelura me trimëri të jashtëzakonshme intelektuale! 

“Vdekja e tij është një humbje e madhe për botën shqiptare në disa përmasa që veç Arbën Xhaferri i mishëronte në një njeri të vetëm. U prehtë në paqe”, thotë Rama. 

SHBA pershendet aktin e nderimit te deshmoreve te UCK-se ne Maqedoni!

Ambasada e Shteteve të Bashkuara të Amerikës ka përshëndetur prijën e vazhdueshme dhe guximtare të ministrit të Mbrojtjes së Maqedonisë, Fatmir Besimi, në përfaqësimin dhe shërbimin e të gjithë qytetarëve të Maqedonisë.

E pyetur nga ALSAT M, për qëndrim lidhur me aktin e nderimit të dëshmorëve të UÇK-së nga pjesëtarët e ARM-së dhe ministrat e Qeverisë, akt që shkaktoi reagime të shumta, ambasada në qëndrimin e saj thotë:

“Para njëmbëdhjetë vite Maqedonia u ballafaqua me rrezikun e një lufte të përgjakur qytetare, dhe familje në tërë vendin ende vajtojnë për humbjen e të dashurve të tyre gjatë dhunës të vitit 2001. Nënshkrimi i Marrëveshjes kornizë me 13 gusht shmangu luftën, dhe mundësoi progresin e Maqedonisë si një demokraci e bashkuar, dinamike dhe e sigurtë”.

“Vizioni dhe patriotizmi i liderëve si ministri Besimi kanë rëndësi kyçe për procesin e shërimit të plagëve që i pësuan të dy anët në atë konflikt, dhe për të ndihmuar që Maqedonia të bëhet një vend që ofron paqë dhe prosperitet për të gjithë qytetarët pa marrë parasysh përkatësinë etnike, gjininë, fenë apo bindjet politike", thuhet mes tjerash në komunikatën e Ambasadës së Shteteve të Bashkuara të Amerikës në Maqedoni.

Ushatret e ARM "perkulen" para deshmoreve te UCK-se ne Maqedoni!

Në mënyrë institucionale në përvjetorin e nënshkrimit të Marrëveshjes së Ohrit, të hënën për herë të parë në Sllupçan të Kumanovës iu bë homazh dëshmorëve dhe martirëve të luftës së 2001. Para dëshmorëve u përkulën edhe pjesëtarë të Armatës së Republikës së Maqedonisë (ARM).

Para tyre u përkulën për herë të parë edhe pjesëtarë të ARM-së që shoqëroheshin nga zv.kryeministri Musa Xhaferi, ministri i Mbrojtjes, Fatmir Besimi, ai i drejtësisë Blerim Bexheti dhe zv.ministri i Punëve të Brendshme, Xhelal Bajrami.

“Sot është 13 gushti dhe gjithë vëmendja e përkushtimi duhet të drejtohet këtu në Sllupçan. Ne e zgjodhëm si vendin më simbolik për arsye se dëshmorët, ata që dhanë gjakun janë më meritorët që u arrit paqja dhe po garantohet interesi jonë kombëtar shqiptar dhe bëjmë thirrje të gjithë qytetarëve që sot të përkujtojnë kujtimin e tyre dhe të ndërgjegjësohen për të realizuar amanetet në interesin tonë kombëtar demokratik, që të përparojë vendi dhe të integrohemi në strukturat e NATO-s dhe BE-së atje ku janë popujt e civilizuar dhe përparuar.“Lavdi të gjithë dëshmorëve, lavdi veprës së tyre”, tha Xhaferri, raporton Alsat M.

Por ajo që ra në sy ishte mosprezenca e ministrave maqedonas nga radhët e VMRO DPMNE-së edhe pse e veçanta ishte se para dëshmorëve të UÇK-së në Sllupcan u përkulën pjesëtarët e Armatës së Republikës së Maqedonisë që në vitin 2001 luftuan njëri kundër tjetrit.

Askush nga delegacioni qeveritar i BDI-së nuk deshi të prononcohet dhe të sqaroj pse në mesin e delegacionit të tyre nuk ishte asnjë koleg nga radhët e partisë kryesore në koalicionin qeverisës, VMRO-DPMNE-së.

Festohet Nata e Kadrit 

Nata e Kadrit, një nga netët më të rëndësishme në fenë islame është festuar për herë të parë nga komuniteti mysliman dhe besimtarët e kësaj feje në një mënyrë madhështore. Në mungesë të një xhamie të madhe besimtarët myslimanë kanë kryer ritualin e faljes në Bulevardin "Dëshmorët e Kombit". 

“Nata e Kadrit është nata e begative të mëdha, e mieësisë, nata të cilën Zoti e ka caktuar që është e vlefshme sa një mijë muaj. Shpresoj që kjo natë dhe begatitë e kësaj nate të bashkojnë gjithë shqiptarët kudo që ndodhen, të harrojnë ato halle që kanë dhe të bashkohen tek besimi në një Zot. Do të thosha që një nga mirësitë e shqiptarëe është se ne dimë të bashkohemi tek vlerat e përbashkëta, pavarësisht se nga vijnë ato”, tha Gazmend Aga, zv/kryetar i KMSH.

Pasi ka përmendur shpërblimet që do të marrë cdo besimtar për agjërimin e Muajit të Ramazanit dhe sakrificave që kalojnë ata në këto ditë të nxehta vere, kryetari i KMSH Haxhi Selim Muca i është lutur Zotit që paqja të mbizotërojë në kombin tonë.

Në këtë program festiv ka qenë i ftuar special egjiptiani Ahmed Naina një nga lexuesit më të mirë në botë të Kuranit. 

Iftar në Sheshin e Flamurit

Mbi 800 besimtarë myslimanë,mbrëmjen e të martës kanë festuar Natën e Kadrit në Vlorë te mbledhur përballë Sheshit të Flamurit. Një poster i madh ishte vendosur në hyrjen e improvizuar të kësaj darke te mbeshtur nga deputeti i PDIU-së, Dashamir Tahiri.

Kreu i Myftinisë së Vlorës, Hito Shaho për këtë natë është shprehur se falenderimet i takojnë vetëm Allahut.

Ne kete darkë te iftarit qe zgjati më shumë se dy orë nuk kishte ftesa, por çdo kalimtar i rastit kishte mundesi te darkonte.

Qerim Sh nga Presheva humb jetën pas goditjes nga vetura

Në aksident trafiku që ka ndodhë me 13 gusht të këtij viti, rreth orës 19:00, në rrugën Ramiz Sadiku në Preshevë ka humbur jetën Qerim Sh (60) nga Presheva.

Deri tek aksidenti ka ardhë kur Adnan S (23) nga Presheva, duke vozitur veturën e tipit "Mercedes" mbrapa me targa VR ka goditur këmbësorin Qerim Sh dhe një fëmijë.

Qerim Sh nga plagat e marra ka humbur jetën në transportin deri tek qendra spitalore në Nish, njofton policia.

Adnan S iu është caktuar masa e paraburgimit prej 48 orëve për shkak të dyshimit se ka kryer vepër penale të rëndë kundër sigurisë në trafik. 

Krasniqi: Nëse veriut i jepet autonomi, ather të njejtën duhet edhe Luginës

Partitë opozitare duhet t’i bashkohen “karvanit të bisedimeve”, nëse duan që t’i parandalojnë të këqijat dhe të kontribuojnë për të mirën e Kosovës. Në të kundërtën, ato s’do të kenë të drejtë të ankohen për rezultatin e bisedimeve.

Kështu ka thënë të martën kryeparlamentari Jakup Krasniqi në një intervistën për “Zërin”. Ai është shprehur i sigurt se gjatë bisedimeve politike me Beogradin zyrtar, veriu nuk do të jetë temë e bisedimeve, por nëse kjo çështje hyn në mënyrë “klandestine” atëherë do të bisedohet në një segment me Luginën e Preshevës.

Krasniqi po ashtu tha se Kosova i ka hyrë në hak Luginës së Preshevës. Demarkacioni i kufirit, dëmet e luftës, fati i të pagjeturve, sipas tij, janë disa nga temat që do të mund të bisedoheshin gjatë bisedimeve të ardhshme. Ai thotë se PDK-ja nuk frikësohet t’i hyjë këtij procesi e vetme, por thekson se këtë gjë nuk ia dëshiron partisë së tij.

Çmimi "Qyteti i të rinjëve 2012" i ndahet Preshevës

Zyrës për të rinj të Komunës së Preshevës, me rastin e paraqitjes në konkursin  “Qyteti i të rinjve 2012”, ngjarje e organizuar nga ana e Iniciativës qytetare në partneritet me një numër të madh të organizatave vendore e ndërkombetare, si Ministria e Rinise, OSBE, Kombet e Bashkuara,Delegacioni Evropian, USAID, NALED,ISC, këtë vit i ndahet çmimi kryesor si “Qyteti i të rinjve 2012” në kategorinë e vetqeverisjeve lokale për ndarjen e hapsirave publike, iniciativave rinore  në bashkësi.

Komuna e Preshevës vitin e kaluar në kuadër të projektit të mbështetur nga ana e programit të Kombeve të Bashkuara PBILD, ka ndarë një haspirë për Klubin për të rinjë, ku me ndarjen e këtij çmimi  i vërtetohet kontributi i përgjithshëm në përmirsimin e pozitës së të rinjve në nivelin lokal, njëherit ky çmim është  inkurajim që në të ardhmen të punohet edhe më shumë në ngritjen dhe përmirsimin e pozitës së të rinjve.

Urime të gjithë të rinjve të Komunës së Preshevës, çmimin “Qyteti i të rinjve 2012”.